அறி முகம்

என் முகம்
திடீரென மறந்து போய்விட்டது
தெரிந்தவர்களிடம்
விவரிக்குமாறு கேட்டேன்
ஒவ்வொருவரும்
ஒவ்வொரு விதமாய் சொன்னார்கள்
எனக்கெனவோர் முகம் இல்லையோ
என பயந்தபோது அவர் வந்தார்
கேள்விகளையும் வந்த
பதில்களையும் சொன்னேன்
என் கேள்விகளே என் முகமாவதாய்
சொல்லிச் சென்றார்

நலம் புனைந்துரைத்தல்

நீ
துள்ளி குதிப்பது
கொள்ளை அழகுதான்..
இருந்தாலும்
இருநொடிகள் பிரிவுத் துயரம் பூமிக்கு

-----------------------------------------------------
உனது காதலன்
கொடுத்து வைத்தவன்
என்னைப் போல்
கவிதை எழுதிக் கொண்டிருக்காமல்
கவிதையை வாசிப்பான்

----------------------------------------------------
நிறைய பாத்திரங்களில்
மழைநீர் பிடிப்பது போன்றது
உன்னுடன் பேசுதல்.
மேகத்தையே எனக்கு வழங்கிவிடேன்!!

------------------------------------------------------
புதுப் புது கிளிஞ்சல்களை
தோடுகளாக அணிந்துகொள்
உனது கூந்தலின் அலைவுகள்
ஏமாற்றட்டும் என்னை.

------------------------------------------------------
------------------------------------------------------
வேறு

நாம் இருவரும்
ஒரே பட்டாம்பூச்சியை
துரத்துகிறோம்
அது சில சமயம் முட்களிலும்
சில சமயம் பூக்களிலும் அமர்கிறது
இன்பம் பூச்சியிடமோ பூக்களிடமோ இல்லை
ஒன்றாய்த் துரத்துவதில் உள்ளது

-------------------------------------------------------
சில பறவைகள்
தாங்கள் அமரும் மரங்களுக்கு
இறக்கைகளை தந்துவிடுகின்றன
மரமும் பறக்கப் போவதில்லை
பறவையும்...
-------------------------------------------------------