முள்

உனது கூர்மை
சற்று குறைவாய் இருந்திருந்தால்
உன்னைப் பற்றி
எழுதியிருக்க மாட்டேன்

மலரின் பின்புறம்
மறைந்து கொண்டிருக்காவிடில்
உன்னைத் தீண்டியிருக்க மாட்டேன்

இப்போதெல்லாம் மலரைவிட
உன்னையே எனக்கு
அதிகம் பிடிக்கிறது

உனது நோக்கம்
வெளிப்படையானது
வாசமும் வண்ணமும்
அவசியமில்லை அதற்கு

மிக அருகிலிருந்தும்
மலரின் உட்புறம்
அறிய இயலாதவர்கள்
நீயும் நானும் தான்

இன்னும் சில

தெய்வங்களே ! உங்களுக்கு
பிடிக்காதவற்றையே
நான் செய்கிறேன்.
பிடித்தவற்றை எல்லாம்
நீங்களே செய்து கொள்ளுங்கள்

----------------------------------------------------------

நிழலுக்காகத்தான் நிற்கிறேன்
இருந்தாலும்
இலைகளின் இடையே
ஒழுகும் வெயிலை
ரசிப்பதாகி விடுகிறது

------------------------------------------------------------

சாலையோரச் செடிகளே
புழுதி படிவதாய்
புகார் கூறவேண்டாம்
பழகிவிடும் உங்களுக்கு

-----------------------------------------------------------

தலையணை யோரம்
சாரையாய் ஊர்ந்து செல்லும்
செவ்வெறும்புகளை சலிக்காமல்
பார்த்துக் கொண்டே இருக்கலாம்
பார்த்துக் கொண்டே இருக்கவும் வேண்டும்